తెలంగాణలో మరో భారీ పెట్టుబడి.. ఎంత మందికి ఉద్యోగాలంటే?

 తెలంగాణ ప్రభుత్వంతో BMS (Bristol Myers Squibb) అవగాహన ఒప్పందం కుదుర్చుకుంది. సుమారు 100 మిలియన్ డాలర్ల పెట్టుబడిని (Investments) పెట్టనున్నట్లు BMS తెలిపింది. ఈ మేరకు రాష్ట్ర పరిశ్రమల శాఖ మంత్రి కే. తారక రామారావు (KTR) సమక్షంలో కంపెనీ అవగాహన ఒప్పందాన్ని కుదుర్చుకుంది. డ్రగ్ డెవలప్మెంట్, ఐటి మరియు ఇన్నోవేషన్ రంగాల్లో కంపెనీ కార్యకలాపాలు నిర్వహించనుంది. రానున్న మూడు సంవత్సరాలలో BMS కంపెనీ ఇక్కడ సుమారు దాదాపు 1500 మంది ఉద్యోగులను నియమించుకోనుంది. ఈ సందర్భంగా కేటీఆర్ మాట్లాడుతూ.. ప్రపంచంలోనే ప్రసిద్ధ టాప్ టెన్ ఫార్మస్యూటికల్ కంపెనీలలో బిఎంఎస్ ఒకటి అని అన్నారు. తెలంగాణ రాష్ట్రానికి వారిని ఆహ్వానిస్తున్నందుకు సంతోషంగా ఉందన్నారు. హైదరాబాద్ నగరం బయోటెక్నాలజీ, ఐటికి గొప్ప ఆకర్షణీయ గమ్య స్థానంగా ఉందన్నారు. హైదరాబాద్ నగరం లో ఉన్న మానవ వనరుల నైపుణ్యం వారి కార్యకలాపాలకు ఉపయుక్తంగా ఉంటుందని భావిస్తున్నానన్నారు. తెలంగాణ రాష్ట్రంలో అద్భుతమైన ప్రతిభాపాటవాలున్న యువకుల టాలెంట్ పూల్ అందుబాటులో ఉందన్నారు కేటీఆర్.

ముఖ్యంగా తెలంగాణ రాష్ట్రంలో ఐటీ మరియు టెక్నాలజీకిలో అద్భుతమైన ప్రతిభ ఉందన్నారు. తెలంగాణ రాష్ట్రంలో తయారీ ప్లాంట్ ను ఏర్పాటు చేయాలని బిఎంఎస్ కు కేటీఆర్ విజ్ఞప్తి చేశారు. హైదరాబాద్ నగరం బయోటెక్నాలజీ లైఫ్ సైన్సెస్ రంగంలో బలంగా ఎదుగుతూ ఉందన్నారు. 2028 నాటికి రాష్ట్రంలోని లైఫ్ సైన్సెస్ ఈకో సిస్టం విలువను రెట్టింపు చేయాలన్న లక్ష్యానికి అనుగుణంగా ఈరోజు బిఎంఎస్ అవగాహన ఒప్పందం ఉందని కేటీఆర్ తెలిపారు. లైఫ్ సైన్సెస్ రంగంలో ఉద్యోగ అవకాశాల కోసం ఎదురుచూస్తున్న తెలంగాణ యువతకు ఈ సంస్థ ఏర్పాటు ఒక గొప్ప అవకాశమన్నారు. MOU ద్వారా 1500 మందిని నియమించుకుంటామన్న బిఎంఎస్ కంపెనీ త్వరలోనే తమ లక్ష్యాన్ని చేరుకొని మరింత మందికి ఉపాధి అవకాశాలు కల్పిస్తుందన్న నమ్మకం ఉన్నదన్నారు. ఈరోజు జరిగిన అవగాహన ఒప్పందం సందర్భంగా హైదరాబాద్ ఫార్మాసిటీలో ఉన్న అవకాశాల గురించి కంపెనీ ప్రతినిధులకు కేటీఆర్ వివరించారు. ఇప్పటికే హైదరాబాద్ ఫార్మసిటీకి అవసరమైన పర్యావరణ మరియు ఇతర అనుమతులు ఉన్న నేపథ్యంలో అక్కడ తయారీ ప్లాంట్ ను ఏర్పాటు చేసేందుకు ఉన్న సౌలభ్యాన్ని వివరించారు.

బిఎంఎస్ కంపెనీ మేనేజింగ్ డైరెక్టర్ సమ్మిత్ హిరావత్ మాట్లాడుతూ.. తమ కంపెనీ ఫార్మస్యూటికల్, బయోటెక్నాలజీ, వైద్యరంగంలో అనేక సేవలను అందిస్తుందన్నారు. ఆయా రంగాల్లో రీసెర్చ్ అండ్ డెవలప్మెంట్ కార్యకలాపాలను నిర్వహిస్తున్నదని వివరించారు. భారత దేశంలో ఈ రంగాల్లో అద్భుతమైన టాలెంట్ పూల్ అందుబాటులో ఉంది. హైదరాబాద్ నగరం గత ఐదు సంవత్సరాల లో అద్భుతమైన అభివృద్ధి సాధించిందన్నారు.

ఐదేళ్ల క్రితం తాను హైదరాబాద్ వచ్చినప్పటి పరిస్థితిని గుర్తు తెచ్చుకుంటే ప్రస్తుతం ఉన్న పరిస్థితులు, మౌలిక వసతుల విషయంలో నగరం ఎంతగానో అభివృద్ధి చెందిందన్నారు. రానున్న మూడేళ్లలో కంపెనీ సుమారు 1500 మంది ఉద్యోగులను నియమించుకోబోతుందన్నారు. సుమారు 100 మిలియన్ డాలర్ల పెట్టుబడిని కంపెనీ పెట్టబోతోందన్నారు. తమ కేంద్రం ఐటి మరియు టెక్నాలజీ, ఇన్నోవేషన్, వైద్య అనుబంధ రంగాల్లో కార్యకలాపాలు నిర్వహించబోతున్నదని చెప్పారు.