టీఎస్పీఎస్సీ అభ్యర్థులకు అలర్ట్.. పరీక్షల తేదీలపై తాజా అప్టేట్స్ ఇవే!

 తెలంగాణ స్టేట్ పబ్లిక్ సర్వీస్ కు సంబంధించిన పేపర్లు లీక్ కావడంతో పరీక్షల నిర్వహణ గందరగోళంగా మారింది. ఎప్పుడు ఏ పరీక్ష ఉంటుందో తెలియని గందరగోళంగా మారింది. ఇందుకు పూర్తి వివరాలు ఇలా ఉన్నాయి. ప్రశ్నపత్రాల లీకేజీ కారణంగా టీఎస్పీఎస్సీ నాలుగు పరీక్షలను రద్దు చేసిన విషయం తెలిసిందే. మరో 2 పరీక్షలను వాయిదా వేసింది. గ్రూప్1 ప్రిలిమ్స్, డీఏవో, ఏఈ, ఏఈఈ, సీడీపీవో, ఎక్స్​టెన్షన్​ ఆఫీసర్, ఫుడ్ సేప్టీ ఆఫీసర్ పరీక్షలను నిర్వహించింది. లీకేజీ వ్యవహారంతో వీటిలో నాలుగు ఎగ్జామ్స్​ రద్దు చేశారు. ఈ నేపథ్యంలో ఈ పరీక్షలకు సబంధించిన కొత్త తేదీల ప్రకటనపై టీఎస్పీఎస్సీ కసరత్తు ప్రారంభించింది. మరో వారం రోజుల్లో ఈ పరీక్షల తేదీలను ప్రకటించానలి భావిస్తోంది. మే నెలలో ఆ పరీక్షలను నిర్వహించాని కమిషన్ నిర్ణయానికి వచ్చినట్లు సమాచారం. ఇందులో కుదిరినన్ని పరీక్షలను కంప్యూటర్‌ బేస్డ్‌ టెస్ట్‌ (CBT) విధానంలోనే నిర్వహించాలని టీఎస్పీఎస్సీ నిర్ణయానికి వచ్చింది. గురువారం టీఎస్‌పీఎస్సీ చైర్మన్‌ బీ జనార్దన్‌రెడ్డి నేతృత్వంలో జరిగిన కమిషన్ భేటీలో ఈ నిర్ణయం తీసుకున్నారు. అయితే.. అధికారులు మాత్రం ఇప్పటికిప్పుడు సీబీటీ విధానంలో పరీక్షలను నిర్వహించడం సాధ్యంకాదని అధికారులు టీఎస్పీఎస్సీ బోర్డుకు తెలిపినట్లు సమాచారం. ఆగస్టు వరకు గడువు ఇస్తేనే సీబీటీ విధానంలో ఎగ్జామ్స్ నిర్వహణకు ఏర్పాట్లు చేయడం వివరించినట్లు తెలుస్తోంది. ఇప్పటికే గ్రూప్- 2, 4 పరీక్షలకు సంబంధించిన పరీక్షల తేదీలను కమిషన్ ప్రకటించింది. వీటిని సైతం రీషెడ్యూల్ చేసే అవకాశం ఉందన్న వార్తలు వినిపిస్తున్నాయి. జులై 1న గ్రూప్-4, ఆగస్టు చివరలో గ్రూప్-2 పరీక్షలు నిర్వహించేలా ప్లాన్ చేశారు. అయితే ఇప్పుడున్న పరిస్థితుల్లో ఈ తేదీలు మారే అవకాశం ఉందని సమాచారం. గ్రూప్​–3 పరీక్షను సైతం ఎప్పుడు నిర్వహించాలన్న అంశంపై కమిషన్ కసరత్తు చేస్తోంది. రద్దుచేసిన, వాయిదా వేసిన, రీషెడ్యూల్ చేసే పరీక్షలకు నిర్వహించే తేదీలను సిట్ రిపోర్ట్ తర్వాతే టీఎస్​పీఎస్సీ ప్రకటించే అవకాశమున్నట్లు సమాచారం. ఏదైనా పోటీ పరీక్షకు నెల, రెండు నెలల ముందుగా ప్రశ్నపత్రాలను సిద్ధం చేస్తారు. దీంతో రద్దయిన, రీషెడ్యూల్ చేసే ఎగ్జామ్స్ కు సంబంధించిన ప్రశ్నపత్రాలను సిద్ధం చేయడానికి సమయం పట్టే అవకాశం ఉంది. ఈ నేపథ్యంలోనే పరీక్షల నిర్వహణ ఆలస్యమయ్యే అవకాశం ఉందని సమాచారం.