అభ్యర్థులకు అలర్ట్.. JL పరీక్షపై హైకోర్టు కీలక ఆదేశాలు..

 జూనియర్ లెక్చరర్ నియామక పరీక్ష రెండో పేపర్ ను తెలుగులో ఇవ్వాలని హైకోర్టు ఆదేశించింది. టీఎస్పీఎస్సీ విడుదల చేసిన ఈ నోటిఫికేషన్ లో జేఎల్ పేపర్ 2ని ఇంగ్లీష్ లోనే ఇవ్వాలని నిర్ణయించింది. కానీ దీనిపై అభ్యర్థులు తీవ్ర అభ్యంతరాలు వ్యక్తం చేశారు. తెలుగులో పీజీ చదువుకున్న అభ్యర్థులు  నష్టపోతున్నామని వారు  టీఎస్పీఎస్సీకి విన్నవించుకన్నా ఫలితం లేకుండా పోయింది.  దీంతో అభ్యర్థులు తీవ్ర నిరసన వ్యక్తం చేశారు. తర్వాత ఈ అంశం కాస్త హైకోర్టు మెట్లు ఎక్కడంతో.. తాజాగా దీనిపై హైకోర్టు తీర్పు ఇచ్చింది. జేఎల్ ప్రశ్నాపత్రం పేపర్ 1 తెలుగు -ఇంగ్లీష్ లో ఇస్తున్నట్లుగానే.. పేపర్ 2 కూడా రెండు భాషల్లో ఇవ్వాలని ఆదేశించింది. ఇటీవల టీఎస్పీఎస్సీ(TSPSC) నుంచి జూనియర్ కాలేజీల్లో జూనియర్ లెక్చరర్(JL) ఉద్యోగాల భర్తీకి నోటిఫికేషన్(Notification) వెల్లడించిన విషయం తెలిసిందే. ఈ నోటిఫికేషన్‌ ద్వారా 1392 పోస్టులను భర్తీ చేయనున్నారు. తెలంగాణ రాష్ట్రం ఏర్పడిన తర్వాత ఇప్పటివరకు జేఎల్‌ పోస్టుల నోటిఫికేషన్‌ వెలువడలేదు. ఉమ్మడి ఆంధ్రప్రదేశ్ రాష్ట్రంలో 2008లో నోటిఫికేషన్‌ జారీ చేశారు. తర్వత అనేక కారణాల వల్ల ఈ పోస్టులను2012లో భర్తీ చేశారు. తెలంగాణ ప్రాంతంలో సుమారు 457 జేఎల్‌ పోస్టులను భర్తీ చేయగలిగారు. ఆ తర్వాత మళ్లీ జేఎల్‌ పోస్టుల భర్తీ జరగలేదు. అంటే దాదాపు 10 ఏళ్ల వరకు ఎలాంటి పోస్టులను భర్తీ చేయలేదు. 10 ఏళ్ల తర్వాత వచ్చిన ఈ పోస్టులకు భారీగా దరఖాస్తులు వచ్చాయి.. ఈ పోస్టులకు మొత్తం 90 వేలకు పైగా దరఖాస్తులు వచ్చాయి.  27 సబ్జెక్టుల్లో.. మల్టీ జోన్ 1 లో 724, మల్టీ జోన్ 2 లో 668 పోస్టులను భర్తీ చేయనున్నారు. దీనికి సంబంధించి పరీక్షను జూన్ లేదా జులై 2023లో నిర్వహించనున్నట్టు ప్రకటించగా.. తాజా పేపర్ లీకేజ్ వ్యవహారంలో ఈ పరీక్ష తేదీలో మార్పులు చోటుచేసుకున్నాయి. కొత్త పరీక్షల తేదీలను టీఎస్పీఎస్సీ  ప్రకటించాల్సి ఉంది.